🔥 ਮੈਂ ਪੰਜਾਬ ਬੋਲਦਾਂ: ਪਰਮਜੀਤ ਲਾਲੀ

🔥 ਮੈਂ ਪੰਜਾਬ ਬੋਲਦਾਂ 🔥

ਸੁਣੋਂ ਓਏ ਲੋਕੋ ਮੈਂ ਪੰਜਾਬ ਬੋਲਦਾਂ,
ਆਪਣੇ ਦੁੱਖੜੇ ਆਪ ਫੋਲਦਾਂ,
ਸੰਨ 47 ਮੇਰੀ ਦਾਦੀ ਉਜੜੀ 84 ਵੇਲੇ ਮਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰ ਕੇ,
ਅੱਜ ਤੱਕ ਵੱਸਦਾ ਹਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰਕੇ
ਅੱਜ ਤੱਕ ਵੱਸਦਾ ਹਾਂ……….
ਮੈ ਉਸ ਧਰਤੀ ਦਾ ਟੁਕੜਾ,
ਜਿਥੇ ਗੁਰੂਆਂ ਪਾਣੀ ਲਾਇਆ,
ਕਿਰਤ ਕਰੋ ਤੇ ਵੰਡ ਛਕੋ ਦਾ,
ਹੋਕਾ ਸੱਭ ਨੂੰ ਲਾਇਆ -੨
ਆਪਣੇ ਵਿਰਸੇ ਨੂੰ ਚੇਤੇ ਕਰਕੇ,
ਅੱਜ ਵੀ ਅੱਖ ਭਰਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰ ਕੇ
ਅੱਜ ਤੱਕ ਵਸਦਾ ਹਾਂ……….
ਪਹਿਲਾਂ ਮੈਨੂੰ ਟੋਟੇ ਕਰਕੇ,
ਕਰਤਾ ਚੜਦਾ-ਲਹਿੰਦਾ,
ਮਸਾਂ ਪੈਰਾਂ ਸਿਰ ਹੋਇਆ ਸੀ,
ਹਾਏ ਮੈਂ ਡਿੱਗਦਾ-ਢਹਿੰਦਾ -੨
ਬੜੇ ਨੇ ਦਿਲ ਵਿੱਚ ਦਰਦ ਸਮੋਏ,
ਨਾ ਜੀਵਾਂ ਨਾ ਮਰਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰ ਕੇ,
ਅੱਜ ਤੱਕ ਵੱਸਦਾ ਹਾਂ……
ਜਮੂੰ, ਹਿਮਾਚਲ ਤੇ ਹਰਿਆਣਾ,
ਮੇਰੇ ਵਿੱਚੋਂ ਕੱਢ ਤੇ,
ਮੈਨੂੰ ਜਾਪੇ ਹੱਥ ਪੈਰ ਮੇਰੇ ਹਾਏ,
ਹੋਵਣ ਕਿਸੇ ਨੇ ਵੱਢਤੇ -੨
ਕੀ-ਕੀ ਬੀਤੀ ਨਾਲ ਮੇਰੇ,
ਮੈਂ ਕੀ -ਕੀ ਜ਼ਿਕਰ ਕਰਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰ ਕੇ,
ਅੱਜ ਤੱਕ ਵੱਸਦਾ ਹਾਂ…….
ਹਰੀ ਸਿੰਘ ਨਲੂਆ ਤੇ,
ਬੰਦਾ ਸਿੰਘ ਬਹਾਦਰ ਸੂਰੇ,
ਹੱਕ ਸੱਚ ਲਈ ਲੜਦੇ ਰਹੇ,
ਹੋ ਕੇ ਜੁਲਮ ਦੇ ਮੂਹਰੇ -੨
ਉਠੋ ਪੁੱਤਰੋ ਬਚਾ ਲਓ ਮੈਨੂੰ,
ਮਿੰਨਤਾਂ ਥੋਡੀਆਂ ਕਰਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰਕੇ,
ਅੱਜ ਤੱਕ ਵੱਸਦਾ ਹਾਂ….
ਗੋਰਿਆਂ ਕੋਲੋਂ ਅਜ਼ਾਦ ਕਰਾਇਆ,
ਭਗਤ- ਊਧਮ ਸਰਦਾਰਾਂ,
ਮੈਨੂੰ ਹੀ ਨੇਂ ਲੁੱਟਣਾਂ ਚਾਹੁੰਦੀਆਂ,
ਦੇਸ਼ ਦੀਆਂ ਸਰਕਾਰਾਂ -੨
ਨਿੱਤ ਪਾਬੰਦੀਆਂ ਮੇਰੇ ਤੇ,
ਹਾਏ ਨਿੱਤ ਹੀ ਮੈਂ ਖਰਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰਕੇ,
ਅੱਜ ਤੱਕ ਵੱਸਦਾ ਹਾਂ…..
ਨਵੀਂ ਪੀੜ੍ਹੀ ਤੋਂ ਆਸ ਸੀ ਮੈਨੂੰ,
ਕੌਣ ਇਹਨੂੰ ਸਮਝਾਏ,
ਮੈਨੂੰ ਛੱਡ ਕੇ ਮੁਲਕ ਬਿਗਾਨੇ,
ਤੁਰ ਪਏ ਮੇਰੇ ਜਾਏ -੨
ਸੁੰਨੇ ਵਿਹੜੇ,ਮਾਪੇ ਵਿਲਕਣ,
ਤਾਲੇ ਲੱਗੇ ਪਏ ਵਿਚ ਘਰਾਂ……
ਫੇਰ ਵੀ ਦਿਲ ਕਰੜਾ ਜਿਹਾ ਕਰਕੇ,
ਅੱਜ ਤੱਕ ਵੱਸਦਾ ਹਾਂ,
ਫੇਰ ਵੀ ਦਿਲ ਕਰੜਾ ਜਿਹਾ ਕਰਕੇ,
ਅੱਜ ਤੱਕ ਵੱਸਦਾ ਹਾਂ…….. ਰਚਨਾਂ ਪਰਮਜੀਤ ਲਾਲੀ
♥️ 98962-44038 ♥️